რომუალდ (რომა) ცუხიშვილი 1963 წელს დაამთავრა თბილისის სახელმწიფო სამხატვრო აკადემიის გამოყენებითი ხელოვნების ფაკულტეტი კერამიკოსის სპეციალობით (პედაგოგები: სერგო ქობულაძე, ვახტანგ ჯაფარიძე გიორგი სესიაშვილი, რევაზ იაშვილი). 1963-1966წწ. მუშაობდა სამხატვრო-საკონსტრუქტორო ბიუროში, შემდეგ საქართველოს ხელოვნების მუზეუმში რესტავრატორად; 1970 წელს დაამთავრა თსსა-იის ასპირანტურა და იქვე დაიწყო მუშაობა პედაგოგად.
1981-1984 წლებში საქართველოს კულტურის სამინისტროს მივლინებით მუშაობდა მოზამბიკის ერთ-ერთ სამხატვრო სკოლაში, სადაც დააარსა კერამიკის განყოფილება. 1978 წელს წლის საუკეთესო ნამუშევრისათვის – ძველი თბილისი გადასცეს საქართველოს მხატვართა კავშირის მედალი; 1980 წელს ვალორისის საერთაშორისო გამოფენაზე კი – დიპლომი ნამუშევრისთვის ვარძია; 1997 წელს გერმანიის ქალაქ ანაბერგ-ბუხჰოლცში გამართულ კერამიკის საერთაშორისო ფესტივალზე დაჯილდოვდა საპატიო პრიზით; 2004 წელს ქ. თბილისში, სახვითი და გამოყენებითი ხელოვნების საშობაო ფესტივალზე, მიიღო პირველი პრემია. მხატვრის ნამუშევრები დაცულია საქართველოს ეროვნულ გალერეაში.