ლევან ხარანაული 1963 წლის 29 სექტემბერს თბილისში დაიბადა. 1986 წელს დაამთავრა თბილისის სახელმწიფო სამხატვრო აკადემიის ფერწერის ფაკულტეტი, ფარნაოზ ლაპიაშვილის კლასი. იგი ფერმწერი, გრაფიკოსი და წიგნის დიზაინერია, რომლის შემოქმედებაშიც მნიშვნელოვანი ადგილი უჭირავს პორტრეტს, მშობლიური გარემოს გამოსახვასა და წიგნის მხატვრულ გაფორმებას.

1983 წლიდან მხატვარი ჯგუფურ გამოფენებში მონაწილეობს. მისი პერსონალური გამოფენები გაიმართა თიანეთის მხარეთმცოდნეობის მუზეუმში, შალვა ამირანაშვილის სახელობის ხელოვნების მუზეუმსა და გიორგი ლეონიძის სახელობის ქართული ლიტერატურის სახელმწიფო მუზეუმში, აგრეთვე თბილისის გალერეებში — „TMS“-სა და „ძველ გალერეაში“. სხვადასხვა დროს მისი ნამუშევრები გამოიფინა ნანტში, პარიზსა და ბოლონიაში. 2023 წელს ლევან ხარანაულის პერსონალურ გამოფენას დიმიტრი შევარდნაძის სახელობის საქართველოს ეროვნული გალერეა მასპინძლობდა.

ხარანაულის შემოქმედებაში განსაკუთრებული ადგილი უჭირავს წიგნის ილუსტრაციას. მას გაფორმებული აქვს მამის, პოეტ ბესიკ ხარანაულის, პოეზიის კრებულები, მარიამ ხუცურაულის „სანათას წიგნი“ და გოდერძი ჩოხელის პროზაული კრებული „ბინდისფერი ხეობიდან ცამდე“. 2007 წელს მხატვარი ლიტერატურული პრემია „გალას“ გამარჯვებული გახდა ბავშვებისთვის ადაპტირებული „დონ კიხოტის“ ილუსტრაციებისთვის. 1988 წელს მან გოდერძი ჩოხელის ფილმში „აღდგომის ბატკანი“ მთავარი როლი შეასრულა.

მხატვრის ფერწერული შემოქმედების ძირითადი თემებია პორტრეტი, მშობლიური თიანეთის პეიზაჟები და ნატურმორტები. მის ნამუშევრებში ხშირად გვხვდებიან თავად მხატვარი, ოჯახის წევრები და მეგობრები. ყოველდღიური გარემო და ნაცნობი ადამიანები პირადი გამოცდილებისა და მოგონებების მატარებლებად იქცევიან. ნატურმორტებში უბრალო საგნები — ჭიქები, ბავშვების ფეხსაცმელები და ყოფითი ნივთები — ოჯახის ყოველდღიური ცხოვრების ამსახველ სახეებად გარდაიქმნება. ამგვარად, მხატვრის შემოქმედებაში პირადი და ოჯახური სამყარო მშობლიური გარემოს განცდას ერწყმის.

ლევან ხარანაულის ნამუშევრები ინახება საქართველოს, იტალიის, გერმანიის, საფრანგეთის, ესპანეთისა და ლუქსემბურგის კერძო კოლექციებში. მისი შემოქმედება თანამედროვე ქართული სახვითი ხელოვნების იმ მიმართულებას უკავშირდება, რომელშიც პირადი გამოცდილება, ოჯახური მეხსიერება და მშობლიური გარემო მხატვრული გამოხატვის მნიშვნელოვან წყაროდ იქცევა. მხატვარი ოჯახთან ერთად თიანეთში ცხოვრობს და მუშაობს.