ილია ზაუტაშვილი მულტიმედიური არტისტი, მრავალი ლოკალური, საერთაშორისო გამოფენისა და სახელოვნებო ღონისძიების მონაწილე ნიუ-იორკიდან სეულამდე, შემოქმედებითი ჯგუფებისა და ინსტიტუციური ინიციატივების დამფუძნებელი, საკურატორო პროექტებისა და კრიტიკული ესეების ავტორი, თბილისის სახელმწიფო სამხატვრო აკადემიის მოწვეული პროფესორი. ადამიანური განზომილება, მეტაფიზიკური კვლევა და მუდმივი ტრანსფორმაცია ილია ზაუტაშვილის შემოქმედების სამი ძირითადი პერსპექტივაა. პირველი იმ რეალობის კვლევაა, რომელიც უშუალოდ ადამიანს უკავშირდება, მეორე ემპირიული სამყაროს მიღმა არსებული რეალობით ინტერესდება, ხოლო მესამე სამყაროს მუდმივ ცვალებადობას ეხმაურება. განსხვავებული კონტექსტების გამოყენების ფონზე მხატვარი თავისუფლად მანიპულირებს მულტიმედიური საშუალებებით. ტექსტი, ობიექტი, იმიჯი, სივრცე, საუნდი მისთვის ერთნაირად მნიშვნელოვანია. თავის ნამუშევრებში ზაუტაშვილი ცდილობს გააღრმავოს და განავრცოს თანამედროვე ესთეტიკა, რათა თქვას უფრო მეტი, ვიდრე მხოლოდ ემპირიული ან ემოციური გამოცდილებაა. „ხელოვნება არ არის სოციუმის მონა“, – ამბობს ილია ზაუტაშვილი და ცდილობს, თავისი შემოქმედება ზედაპირული სოციალური კლიშეებისგან დაიცვას. ის ადამიანის საქმიანობის მოსაზღვრე ტერიტორიების ინტეგრალურ კვლევას მიმართავს კონტექსტში – „ხელოვნება-საზოგადოება-პიროვნება“. ეს ნიშნავს რეფლექსიას რეალობაზე იმ ახალი იდეებისა და დამოკიდებულებების აღმოსაჩენად, რასაც ხელოვანი საზოგადოებას სთავაზობს.
