თამარ კარბელაშვილი დაიბადა 1937 წლის 11 სექტემბერს. მისი შემოქმედების ძირითადი მიმართულებებია დაზგური გრაფიკა, წიგნის გაფორმება და ილუსტრაცია, თუმცა მხატვარი ფერწერულ ტილოებსაც ქმნიდა. იგი 1962–1966 წლებში სწავლობდა თბილისის სახელმწიფო სამხატვრო აკადემიის გრაფიკის ფაკულტეტზე. აკადემიის დამთავრების შემდეგ მუშაობა დაიწყო გამომცემლობა „განათლებაში“, მოგვიანებით კი თანამშრომლობდა სხვა გამომცემლობებთანაც და აქტიურად მონაწილეობდა წიგნის მხატვრულ გაფორმებაში.

თამარ კარბელაშვილმა პროფესიული აღიარება ჯერ კიდევ სადიპლომო ნამუშევრით მოიპოვა, რომელიც გამორჩეული გრაფიკული ენითა და მხატვრული გამომსახველობით გამოირჩეოდა. ფერადი ლინოგრავიურის ტექნიკით შესრულებული სულხან-საბა ორბელიანის „სიბრძნე სიცრუისას“ ილუსტრაციები დახვეწილი ფერადოვნებითა და მაღალი მხატვრული ოსტატობით გამოირჩევა. მოგვიანებით წიგნის გრაფიკა მისი შემოქმედების წამყვან მიმართულებად იქცა. მხატვარს გაფორმებული აქვს სხვადასხვა ჟანრის ლიტერატურული გამოცემები და სასკოლო სახელმძღვანელოები.

დაზგურ გრაფიკაში კარბელაშვილი ლინოგრავიურასთან ერთად სანგინას, პასტელს, გუაშსა და ტემპერას იყენებდა. ამ ტექნიკებით შექმნილ ნამუშევრებში მხატვარი თავშეკავებული გამომსახველობითა და დახვეწილი ფერადოვნებით გადმოსცემდა ბუნებისა და ქალაქის პეიზაჟებს. მის შემოქმედებაში განსაკუთრებული ადგილი უჭირავს სვანეთისა და თიანეთის ხედებს, აგრეთვე თბილისის პეიზაჟებს.

კარბელაშვილი მონაწილეობდა საქართველოში გამართულ ჯგუფურ გამოფენებში 1963, 1965, 1966, 1971, 1990 და 1991 წლებში. 1980 წელს გაიმართა მისი პერსონალური გამოფენა.