ნიკოლოზ კოკა ციხელაშვილი დაიბადა თბილისში. 1982-1988 წლებში სწავლობდა თბილისის სახელმწიფო სამხატვრო აკადემიის სახვითი ხელოვნების ფაკულტეტზე. სადიპლომო ნამუშევარი გაიგზავნა მოსკოვში საბჭოთა კავშირის საუკეთესო სადიპლომო ნამუშევრების გამოფენაზე. 2005 – 2022 წლებში იყო თბილისის სახელმწიფო სამხატვრო აკადემიის ასოცირებული პროფესორი. კოკა ციხელაშვილი ძირითადად მუშაობს ორ მედიუმში – ფერწერასა და გრაფიკაში. მისი ნამუშევრები ერთიან თვითმყოფად ეკოსისტემას შეადგენენ. ამ სამყაროში ნახევარტონებისა და მოქნილი ფორმების ურთიერთკავშირი ქმნის რთულ დეკორატიულ კომპოზიციებს. კოკას ნამუშევრებში ხშირად არის გამოსახული ქალის ფიგურა ან ფიგურათა ჯგუფი, ცხოველების – უპირატესად ცხენების გამოსახულებები. გამჭვირვალობა არსებითია კოკა ციხელაშვილის ნამუშევრებში, კოლორიტი იქმნება სხვადასხვა ფერის ჰაეროვანი ფენებით. კოკა ციხელაშვილის ფერწერა და გრაფიკა ინახება მრავალ მუზეუმში, გალერეასა და კერძო კოლექციაში საქართველოში, ევროპასა და ჩრდილოეთ ამერიკაში.
