ლალი ქუთათელაძე, ხელოვანი, კერამიკოსი. დაამთავრა თბილისის სახელმწიფო სამხატვრო აკადემია (1982); დაარსა ქართული კერამიკული ხელოვნების და რეწვის ფონდი „თიხის ოფისი“ (2007).
1980/1990-იანი წლებიდან მოყოლებული აქტიურად მონაწილეობს როგორც ადგილობრივ ისე საერთაშორისო პროექტებსა და გამოფენებში, როგორც ხელოვანი და კურატორი: “Fest I Nova 2017” – „ურთიერთობის მრავალფერი ხალიჩა“, Art Villa Garikula; “კედლის ობიექტი – მასალა თიხა”, ეროვნული გალერეა, თბილისი (2016); “Fest I Nova 2015”-„ცეცხლოვანი კედელი“, Art Villa Garikula; „კუნძული საგამოფენო სივრცეში“, ლადო გუდიაშვილის საგამოფენო დარბაზი, თბილისი (2014); “მსვლელობა”, ლითოგრაფია _ გალერეა “შარდენი” სასტუმრო თბილისი მარიოტი (2010). სხვადასხვა პერიოდში ლალი ქუთათელაძე ეწევა პედაგოგიურ საქმიანობას – თბილისის ტექნიკურ უნივერსიტეტში, თბილისის სახელმწიფო სამხატვრო აკადემიასა და თბილისის სახელმწიფო უნივერსიტეტში.
თუ დინამიკაში განვიხილავ ლალი ქუთათელაძის ხელოვნებას – ცხოვრების სხვადასხვა ეტაპზე მისი დამოკიდებულება თვითგამოხატვის მიმართ არასოდეს ყოფილა ერთმნიშვნელოვანი: ჩაკეტილობიდან გახსნილობამდე და პირიქით; სულიერი მდგომარეობა, დამოკიდებულება საზოგადოებასთან და აქედან გამომდინარე ესთეტური პრიორიტეტები აისახება მის ნამუშევარებში; მუდმივად ახლის ძიების სურვილი წარმოადგენს მხატვრის ხედვით რაიმე განსხვავებულის შექმნის საფუძველს.