ლადო ფოჩხუა დაიბადა სოხუმში 1970 წელს, სახელოვნებო განათლება მიიღო თავდაპირველად 1990-1993 წლებში სოხუმის სახვითი ხელოვნების სახელოსნოში, შემდეგ კი 1993-2001 წლებში თბილისის სახელმწიფო სამხატვრო აკადემიაში სახვითი ხელოვნების მიმართულებით, ხოლო 2001 წელს დაამთავრა აკადემია ფერწერისა და ბეჭდვის მაგისტრის ხარისხით. იგი ცხოვრობდა და მოღვაწეობდა სხვადასხვა ქვეყანაში: საქართველო, რუსეთი, აზერბაიჯანი, უნგრეთი და აშშ. ამჟამად ლადო ფოჩხუა ცხოვრობს ნიუ იორკში.
ხელოვანი მუშაობს სხვადასხვა ტექნიკასა და მედიაში; ხშირად- გრაფიკაში, ტუშით ან მელნით დიდ ფორმატზე. მისი ერთ- ერთი თემაა კლასიკური სურათებისა და სტილის ახალ ფორმატში გადმოცემა.
ლადო ფოჩხუას ნამუშევრები ასახავს დროში მოგზაურობას. მისი გმირები წარსულის ნიშნებს ატარებენ და ამავე დროს მოგზაურობენ მომავალში. მხატვარი მუშაობს თანამედროვე ფილოსოფიის ისეთ საკითხებზე, როგორიცაა სიმულაკრის თეორია და წარსულის კვლევა. ფოჩხუას ნამუშევრები თანაარსებობს საინფორმაციო კულტურაში გავრცელებულ სხვა სიმულაკრებთან.
ხელოვანი სხვადასხვა პერიოდში მონაწილეობდა საქართველოში და საზღვრგარეთ გამართულ ჯგუფურ და პერსონალურ გამოფენებში: 2018 წელი – წიგნი ახალი არისტოკრატიისთვის, წყალტუბოს ხელოვნების ფესტივალი; Project ArtBeat, საქართველო; 2015 წელი – აღმოაჩინე საქართველო ნიუ იორკში, Chelsea Market, ნიუ იორკი, აშშ; 2014 წელი – დუბაის ხელოვნების ბაზრობა; 2013 წელს ფოჩხუას პერსონალური გამოფენა გაიმართა დიმიტრი შევარდნაძის სახელობის ეროვნულ გალერეაში. 2013 – შემთხვევითი სიმარტივე, საინაუგურაციო გამოფენა, ბრუკლინ ბოქს გალლერი, ბრუკლინი, ნიუ იორკი, აშშ; 2013 – აფექტების შემდეგ, Chashama Art Space – ჩელსი, ნიუ იორკი, აშშ; 2009 წელი-პრაღის ბიენალე; 2008 – ბაღები, გემები და გაკვეთილები, კ. პეტრი ჰაზის გალერეა, ბუდაპეშტი, უნგრეთი.
წყარო: www.galleryartbeat.com