ვიქტორია (ვიკა) ბერიშვილი, არტისტი და დიზაინერი, დაიბადა 1984 წლის 30 აგვისტოს თბილისში. 2001–2007 წლებში სწავლობდა თბილისის სახელმწიფო სამხატვრო აკადემიის არქიტექტურის ფაკულტეტზე, ხოლო 2014–2016 წლებში — იტალიაში, მილანის დიზაინის პოლიტექნიკურ სკოლაში (Scuola Politecnica di Design). ამჟამად მუშაობს დიზაინერად და არტისტად, ასევე კითხულობს ლექციებს ინტერიერის დიზაინში.

ბერიშვილი მუშაობს ფერწერასა და გრაფიკაში. მისი შემოქმედება მოიცავს აბსტრაქციას, ლანდშაფტსა და მაგიური რეალიზმის ნიშნების მქონე სიუჟეტურ კომპოზიციებს. მხატვრულ პრაქტიკაში ერთმანეთს უკავშირდება არქიტექტურული განათლება და ფერწერული აზროვნება.

ბერიშვილის შემოქმედებითი საქმიანობა 2000-იანი წლებიდან ვითარდება და თანამედროვე ქართული ხელოვნების პროცესს უკავშირდება. მისი მნიშვნელოვანი პერსონალური გამოფენებია „თოვლის ქვეყანა“ (2011, გალერეა „9“), 2017 წლის გამოფენა გალერეა „წითელ კვადრატში“ და „უსახო“ (2024, გალერეა „წითელი კვადრატი“). ჯგუფურ გამოფენებსა და პროექტებში მონაწილეობს 2008 წლიდან, მათ შორის „Red“ (2009) და „Madam“ (2010), გალერეა „9“-ში. 2025 წელს მისი ნამუშევრები წარმოდგენილი იყო ლონდონის Bonhams-ის აუქციონზე.

მისი ნამუშევრებია:
“უსათაურო” (ტილო, ზეთი, 2022);
“მოხუცი იაპონელი ქალი და კატა” (ტილო, აკრილი, ზეთი, 2023);
“ლანდშაფტი” (ტილო, ზეთი, 2023);
“ვარდისფერი მთა” (ტილო, ზეთი, 2025);
“წითელი ხე” (კალამი, აკვარელის ქაღალდი, 2025);
“უცნობები” (შერეული ტექნიკა, აკვარელის ქაღალდი, 2026).