ჩინგიზ ფარზალიევი დაიბადა 1943 წელს. 1973 წელს დაამთავრა ვ. სურიკოვის სახელობის მოსკოვის სახელმწიფო სამხატვრო ინსტიტუტის ფერწერის ფაკულტეტი. 2008 წლიდან აზერბაიჯანის სახელმწიფო სამხატვრო აკადემიის პროფესორია, 2010 წლიდან – აზერბაიჯანის ეროვნული მუზეუმის დირექტორი. ჩინგიზ ფარზალიევი გამორჩეული ხელოვანი და საზოგადო მოღვაწეა. არის მრავალი საერთაშორისო აკადემიური რეგალიის, ორდენისა თუ ჯილდოს მფლობელი: კემბრიჯის უნივერსიტეტის საერთაშორისო საინფორმაციო-ბიოგრაფიული ცენტრისა და ვ. სურიკოვის სახელობის მოსკოვის სახელმწიფო სამხატვრო ინსტიტუტის საპატიო პროფესორი; თბილისის სახელმწიფო სამხატვრო აკადემიის საპატიო დოქტორი. მსოფლიოს კულტურასა და მეცნიერებაში შეტანილი წვლილისთვის მიენიჭა ჰანოვერის ევროპის საბუნებისმეტყველო მეცნიერებათა აკადემიის საპატიო მოღვაწის წოდება; ავსტრიის რესპუბლიკის წინაშე დამსახურებისათვის გადაეცა ღირსების დიდი ორდენი; საქართველოს ბრწყინვალების საპრეზიდენტო ორდენი; დიდების ორდენი აზერბაიჯანის სახვითი ხელოვნების განვითარებაში შეტანილი წვლილისათვის; საფრანგეთის ხელოვნებისა და ლიტერატურის ორდენი ხელოვნებასა და ლიტერატურაში შეტანილი წვლილისათვის; ათათურქის საერთაშორისო პრემია; ნიზამი განჯევის (განძელის) მედალი და სხვ. ჩინგიზ ფარზალიევის ხელოვნება ცნობილია შთამბეჭდავი პეიზაჟებით, ნატურმორტებითა და სხვადასხვა ხასიათის ნამუშევართა ფილოსოფიური შინაარსით. 2023 წელს დიმიტრი შევარდნაძის სახელობის ეროვნულ გალერეაში გაიმართა ჩინგიზ ფარზალიევის რეტროსპექტული გამოფენა – დროის საფეხურებზე.
