ავთანდილ მონასელიძე 1968-1974 წლებში სწავლობდა თბილისის სახელმწიფო სამხატვრო აკადემიის ქანდაკების ფაკულტეტზე (პედაგოგები: ვალენტინ თოფურიძე, გოგი ოჩიაური). მხატვრის ძირითადი ნამუშევრებია: მინდვრის დედოფალი (1975. ბრინჯაო), ქირონი და ორფეოსი (1988. ბრინჯაო), მრავალფიგურიანი კომპოზიცია ბერიკაობა (1991. ბრინჯაო. თბილისი), მეტრო ვარკეთილის შესასვლელი (1986), რელიეფი თბილისის აეროპორტის ვესტიბიულისთვის… მოქანდაკეს მიღებული აქვს რამდენიმე ჯილდო ამიერკავკასიის რესპუბლიკების I ბიენალე, ვერცხლის მედალი (1986), პარიზის საერთაშორისო გამოფენა, ვერცხლის მედალი (1984), საქართველოს მხატვართა კავშირის მედალი, წლის საუკეთესო ნამუშევრისთვის (1980). მისი სკულპტურები დაცულია საქართველოს ეროვნულ გალერეაში, ტრეტიაკოვის გალერეაში (მოსკოვი), რუსეთის კულტურის სამინისტროს სამხატვრო ფონდებში, საქართველოს ყოფილ სამხატვრო ფონდსა და კერძო კოლექციებში.