გურამ გელოვანმა 1954 წელს დაამთავრა თბილისის სამხატვრო აკადემია. მხატვარ გ. გელოვანის თაობა, რომელიც შემოქმედებით ასპარეზზე 1950-იანი წლებიდან გამოდის, ცხოვრობდა და მოღვაწეობდა საბჭოთა სისტემის ფარგლებში. ამ თაობის მხატვრული პრაქტიკაც ოფიციალური, ჯერაც სოც- რეალისტური მეთოდით რეგლამენტირებულ გარემოში ფუნქციონირებდა, ამავდროულად, მასში უკვე მოიაზრებოდა მნიშვნელოვანი შემოქმედებითი პოტენციალი. 1954 წლიდან აქტიურად მონაწილეობდა სამხატვრო გამოფენებში. გურამ გელოვანი მრავალეროვანი საბჭოთა მხატვრული ისტებლიშმენტის ერთ-ერთი გამორჩეული ქართველი ავტორია, რომლის ნიჭიერებას აღიარებდა ოფიციოზი, არ აკლებდა მას წახალისებას და ჯილდოებს, მაგრამ შესაბამისად მკაცრ მოთხოვნებსაც უყენებდა. გურამ გელოვანის ფიგურატიული მხატვრობა იყო მოთხოვნადი რკინის ფარდით გამიჯნულ დასავლეთშიც. მნიშვნელოვანი ნამუშევრებია: “ახალგაზრდობა” (1957, საქართველოს ხელოვნების მუზეუმი), “დედის პორტრეტი” (1953), “ოჯახი დუშეთიდან” (1964), “მშვიდობის სადარაჯოზე”(1965, საქართველოს სურათების გალერეა). 1965 წელს საქართველოს დამსახურებული მხატვარის წოდება მიენიჭა.