დიმიტრი ერისთავი, ქართველი გრაფიკოსი, კინოს მხატვარი და წიგნის დიზაინერი დაიბადა 1931 წელს თბილისში. 1956 წელს დაამთავრა თბილისის სახელმწიფო სამხატვრო აკადემიის გრაფიკის ფაკულტეტი, სადაც მისი პედაგოგები იყვნენ იოსებ შარლემანი, სერგო ქობულაძე, ვლადიმერ გრიგოლია და დავით გაბაშვილი. 1962 წლიდან მუშაობდა კინოსტუდია „ქართული ფილმის“ დამდგმელ მხატვრად, ხოლო 1967 წლიდან ეწეოდა პედაგოგიურ საქმიანობას თბილისის სახელმწიფო სამხატვრო აკადემიაში; 1982 წლიდან პროფესორი იყო. 

ერისთავის შემოქმედების ძირითადი სფეროებია გრაფიკა, წიგნის ილუსტრაცია, ჟანრული კომპოზიცია, თეატრისა და კინოს მხატვრობა. მის შემოქმედებაში მნიშვნელოვანი ადგილი უჭირავს პორტრეტსა და თბილისის თემატიკას, მათ შორის „ძველი თბილისის“ გრაფიკულ ციკლს (1972) და მ. აბაზაძის (1963), ნ. ერისთავისა (1965) და მ. მაჭავარიანის (1973) პორტრეტებს. 

მისი შემოქმედება XX საუკუნის მეორე ნახევრის ქართული გრაფიკისა და წიგნის ხელოვნების განვითარებას უკავშირდება. იგი აქტიურად მონაწილეობდა საგამოფენო ცხოვრებაში 1957 წლიდან და თანამშრომლობდა ქართულ პერიოდულ გამოცემებთან, მათ შორის ჟურნალებთან „ნიანგი“ და „ცისკარი“ და გაზეთ „ლიტერატურული საქართველო“. კინოს მხატვრობის მიმართულებით გააფორმა ფილმები „მე, ბებია, ილიკო და ილარიონი“ (1962), „გიორგობის თვე“ (1966), „არაჩვეულებრივი გამოფენა“ (1968), „იყო შაშვი მგალობელი“ (1970), „მთვარის ფავორიტები“ და „და იქმნა სინათლე“ (1984), ასევე „ექსპრეს-ინფორმაცია“ (1993). 

მისი წიგნის გრაფიკის მნიშვნელოვანი ნიმუშებია შექსპირის „ჰამლეტის“ გაფორმება და ილუსტრაციები, „ქართული ხალხური ზღაპრები“ და „100 ქართველი და 100 ეპიზოდი“. 1979 წელს გამოიცა მისი გრაფიკული ნამუშევრების ალბომი, ხოლო 2010 წელს „დიმიტრი ერისთავი. გრაფიკა“. ერისთავს 1985 წელს მიენიჭა საქართველოს სახალხო არტისტის წოდება, 1990 წელს საქართველოს სახელმწიფო პრემია, ხოლო 2006 წელს შოთა რუსთაველის სახელობის სახელმწიფო პრემია. 2016 წელს გახდა თბილისის საპატიო მოქალაქე. მისი ნამუშევრები დაცულია სახელმწიფო მუზეუმებსა და კერძო კოლექციებში.

მისი ნამუშევრებია:
„დილა გარეუბანში“ (ქაღალდი, პასტელი, 62 × 66 სმ, 1962);
„ავტობუსის გაჩერება“ (1965);
„კლასობანა“ (ქაღალდი, ფანქარი, 1965);
„ზამთარი“ (1959);
„საბავშვო ბაღი“ (1959);
„ლაღიძის წყლები“ (1965);
აფიშა კინოფილმისთვის „ქორწილი“ (1965);
აფიშა კინოფილმისთვის „გიორგობისთვე“ (1966).