თამარ მინაშვილი დაიბადა 1964 წელს ქ. თბილისში. 1980-1984 წლებში სწავლობდა იაკობ ნიკოლაძის სახ. სამხატვრო სასწავლებელში ფერწერის სპეციალობაზე; იყო ელენე ახვლედიანის სახ. სტიპენდიანტი. სასწავლებლის წარჩინებით დამთავრების შემდეგ, იმავე წელს ჩააბარა თბილისის აპოლონ ქუთათელაძის სახ. სახელმწიფო სამხატვრო აკადემიაში სახვითი ხელოვნების ფაკულტეტის გრაფიკის მიმართულებაზე. 1991-1993 წლებში გაიარა ასპირანტურის კურსი (ახლანდელი დოქტორანტურა) წიგნის ილუსტრაციის სპეციალობით და 1995 წლიდან დაიწყო მუშაობა სამხატვრო აკადემიაში ხატვის და ფერწერის პედაგოგად არქიტექტურის ფაკულტეტის მონუმენტური ხელოვნების კათედრაზე. 1997 წლიდან არის საქართველის მხატვართა კავშირის წევრი. 2009 წლიდან არის თბილისის სახელმწიფო სამხატვრო აკადემიის სახვითი ხელოვნების ფაკულტეტის ფერწერის მიმართულების პროფესორი. ყოველწლიურად მონაწილეობს სხვადასხვა გამოფენებში საქართველოში და მის ფარგლებს გარეთ: საფრანგეთში, იტალიაში, ამერიკაში (ვაშინგტონი), რუმინეთში, ირანში, ლიტვაში და სხვ. თამარ მინაშვილი წარმატებით მონაწილეობს სხვადასხვა სახელოვნებო პროექტებში როგორც საქართველოში, ისე ქვეყნის ფარგლებს გარეთ: იუნესკოს ეგიდით ჩატარებული საერთაშორისო “არტ პლენერი “ ტრანსილვანია (2011), რაშნოვი (რუმინეთი) (2012); გალიპოლში (სამხრეთ იტალია) იუნესკოს ეგიდით ჩატარებული საერთაშორისო სახელოვნებო სიმპოზიუმი (2013); იუნესკოს ეგიდით მოწყობილ საერთაშორისო სახელოვნებო სიმპოზიუმზე ბუკოვინაში (რუმინეთი) (2014); გამოფენა პარიზში -“პეტრაუტიდან პარიზამდე “ (2017); ქართველთა და ლატვიელთა დამოუკიდებლობის 100 წლისთავისადმი მიძღვნილი გამოფენა რიგაში (2018); უკრაინის ომისადმი მიძღვნილი საქველმოქმედო გამოფენა ARTIST FOR UKRAINE – თბილისის სახელმწიფო სამხატვრო აკადემია და სხვა (2022).