ალექსანდრე ბერდიშევი – გრაფიკოსი, ფერმწერი, დიზაინერი და ფოტოხელოვანი. მან 1988 წელს დაამთავრა თბილისის სახელმწიფო სამხატვრო აკადემია. 1990 წელს სტაჟირება გაიარა გლაზგოს უმაღლესი ხელოვნების (მაკინტოშის) სკოლაში (შოტლანდია). ალექსანდრე ბერდიშევმა შექმნა სრულიად ორიგინალური მხატვრული სამყარო, რომელშიც მოდერნისტული მიმდინარეობების უცნაური ნაზავია. მხატვრის ნამუშევრები ყოველთვის საცნობია… უჩვეულო, სიურრეალისტური გამოსახულებები ვიზუალურად ყოველთვის მოწესრიგებულ, ფერითა თუ ფორმით დახვეწილ კომპოზიციებში ეწერება. მხატვარი აქტიურ შემოქმედებით მოღვაწეობას ეწევა საქართველოსა და მის ფარგლებს გარეთ. ვრცელია მისი გამოფენების ჩამონათვალი ავსტრიის, ესპანეთის, დიდი ბრიტანეთისა და შოტლანდიის სხვადასხვა ქალაქში.
