ლუკა ლასარეიშვილი (ლუკა ლაზარი) 1982 წლიდან დამოუკიდებელ პროფესიონალ მხატვრად მონაწილეობს გალერეებსა და მუზეუმებში გამართულ მრავალ პერსონალურ და ჯგუფურ გამოფენაში. ის მუშაობს სხვადასხვა მედიუმში: ფერწერა, ინსტალაცია, ობიექტი და ვიდეოარტი.

1989 წელს ლუკა ლაზარი ცხოვრობდა კასელში, გერმანიაში, როგორც ფრიდერიციანუმის მუზეუმის რეზიდენტი მხატვარი. 2003 წლიდან დღემდე ის ცხოვრობს და მუშაობს ნიუ-იორკში, აშშ-ში.

1990-იანი წლების დასასრულს მხატვარი დაინტერესდა მინიმალისტურ-აბსტრაქტული ხელოვნებით, რის შედეგადაც შექმნა სერიები „თეთრი ფარდა“ და One-liners. ამ პერიოდიდან მან დაიწყო საკუთარი მხატვრული სტილის განვითარება, რომელიც ეფუძნება მინიმალისტურ, აბსტრაქტულ, გეომეტრიულ და ოპტიკურ ხელოვნებას, ასევე შეიცავს ექსპრესიონიზმის სახიერ ნიშნებს. შედეგად, ლაზარის ნამუშევრები განუმეორებელი და უნიკალურია, არ მიეკუთვნება რომელიმე არსებულ მხატვრულ მიმდინარეობას ან სტილს.

მისი ნამუშევრები ქმნის სივრცეში უწყვეტი მოძრაობის შეგრძნებას, რაც მათი სახელწოდებიდანაც იგრძნობა – „მოძრავი კადრები“.

ლუკა ლასარეიშვილის პერსონალური და ჯგუფური გამოფენები იმართება მსოფლიოს მრავალ ქალაქში, მათ შორის: მოსკოვში, პარიზში, ბაზელში, ჰამბურგში, მიუნხენში, კასელში, კილში, ვარშავაში, ბერლინში, დალასში და ნიუ-იორკში.