ქეთი დავლიანიძე დაიბადა თბილისში 1976 წელს. 1998 დაამთავრა სერგო ქობულაძის სახელოვნებო დაზგური გრაფიკის სტუდია, ხოლო 1996 თბილისის სახელმწიფო სამხატვრო აკადემიის, კინოსა და ტელევიზიის ფერწერის ფაკულტეტი. 1999 წელს იმავე სამხატვრო აკადემიაში – გრაფიკა, ხელოვნების ფაკულტეტი. ქეთი დავლიანიძის შემოქმედება მოიცავს ხელოვნების მრავალ დარგსა და მრავალფეროვან მასალას, მათ შორისაა ფერწერა, გრაფიკა, წიგნის ილუსტრაცია, ქანდაკება, ფოტოგრაფია და მულტიმედია. მხატვრის ნამუშევრებს გამოარჩევს დახვეწილი ხაზის მეტყველება. ფერის განსაკუთრებული გრძნობით შერჩეულ ჰაეროვან პასტელურ გამას ჰარმონიულად ერწყმის გრაფიკული ფორმა.
ქეთი დავლიანიძეს მონაწილეობა აქვს მიღებული არაერთ ჯგუფურ თუ პერსონალურ გამოფენაში, როგორც საქართველოში, ისე მის ფარგლებს გარეთ; თბილისის სახელმწიფო სამხატვრო აკადემიის 80 წლისთავი, საქართველოს ეროვნული მუზეუმი (2000); თბილისის ისტორიის მუზეუმი ქარვასლა (2002); „მწვანე“ ეროვნული გალერეა, თბილისი, საქართველო (2016), ქართული სახვითი ხელოვნების მუზეუმი „აფხაზეთი” თბილისი, (2019); „Painters Planer” ფრანკოფონიის მე-9 საერთაშორისო ფესტივალი “Soleil” სოზოპოლში (2019); „ქართველი მხატვრები“, კაუნასი, ლიეტუვა (2018); პროექტი „Un Cammino Europeo“, ვიტერბო, იტალია (2014) და მრავალი სხვ.
მისი ნამუშევრები ინახება სხვადასხვა ქვეყნის, კერძო კოლექციაში; აშშ-ში, ჩინეთში, ესპანეთში, იტალიაში, ასვტრიაში, ბულგარეთში, რომის პაპის კერძო კოლექციაში, ვატიკანი, ხოლო საქართველოში – სიღნაღის ეროვნულ მუზეუმში, საქართველოს სახვითი ხელოვნების მუზეუმის მუდმივ კოლექციაში და სხვ.