ავტოპორტრეტი სარკესთან

ავტოპორტრეტი, როგორც ერთგვარი შუამავალი ხელოვნება, ხილულისა და სიმბოლურის, ცნობიერისა და პერსონალური/ტრანსპერსონალური არაცნობიერის ზღვარზე არსებობს. საკუთარი თავის წარდგენის პირობებში ის მე-ზე, როგორც სუბიექტ-ობიექტზე და თანადროულ კულტურულ ფენომენებზე დაკვირვებას გვთავაზობს და მოიცავს ერთდროულად, როგორც რეფლექსიას სხვადასხვა გამოცდილებებში მყოფ შემოქმედზე, ასევე მასში დაბუდებულ უცხოზე, „სხვაზე“, თუ მოუხელთებელ „სხვებზე“.

დავით კაკაბაძის მიერ ავტოპორტრეტების („ავტოპორტრეტი სარკესთან”, „ავტოპორტრეტი ბროწეულებით“, „ავტოპორტრეტი რუხ ხალათში“)  შექმნიდან 110 წლის შემდეგ, ეროვნულ გალერეაში წარმოდგენილი გამოფენა ეძღვნება ისეთ მნიშვნელოვან, მრავალშრიან და ენიგმატურ ფენომენს ხელოვნებაში, როგორც ავტოპორტრეტია, რომელიც არა მხოლოდ პიროვნების თვითრეფლექსიის ფორმაა, არამედ მხატვრის თანადროული ეპოქის სიმბოლური განსახიერება.

ექსპოზიცია, რომელიც მოიცავს პერიოდს XIX საუკუნიდან დღევანდელობამდე და აერთიანებს სხვადასხვა თაობის ქართველ მხატვარს (აგრეთვე პოეტს), ბოლო ასი წლის განმავლობაში შექმნილი ავტოპორტრეტების რეტროსპექტივაა. საკუთარი თავის შეცნობისაკენ სწრაფვის გამოხატულებების ერთობა განსაკუთრებული შესაძლებლობაა თვალი გავადევნოთ საუკუნოვან პროცესს, თუ როგორ ირეკლება ავტორი სამყაროში და პირიქით – გარემო მის გამოსახულებაში.

კურატორი: ქეთევან (ქეთი) შავგულიძე, ხელოვნებათმცოდნეობის დოქტორი

გამოფენას წარმოგიდგენთ კულტურის ცენტრი ATINATI’S

ღონისძიება ეძღვნება აპოლონ ქუთათელაძის სახელობის თბილისის სახელმწიფო სამხატვრო აკადემიის 100 წლისთავს.

გამოფენის გახსნა: 4 თებერვალი, 16.00

გამოფენის გახსნაზე ხელოვანი ანდრო დადიანი წარმოადგენს პოეტური ავტოპორტრეტების რევიუს მოდერნიზმიდან თანამედროვეობამდე.