ART.GOV.GE   >   არქივი   >   2016   

არქივი




მუზეუმის კვირეული: ავანგარდი 1900-1937

18 05.2016 – 18.06.2016
ხელოვნების მუზეუმი


2016 წლის 18 მაისს 18:00 საათზე მუზეუმის საერთაშორისო დღისადმი მიძღვნილი საქართველოს ეროვნული მუზეუმის კვირეულის ფარგლებში, შალვა ამირანაშვილის სახელობის ხელოვნების მუზეუმში გიწვევთ გამოფენის „ავანგარდი/Avant-garde 1900-1937" გახსნაზე.
ავანგარდული ხელოვნება და კულტურა XX საუკუნის ინდუსტრიულ-ტექნოლოგიური ძვრების ფონზე განვითარდა. ეს დრო ხელოვნებაში ნოვაციების, მხატვრული სისტემებისა და თეორიების ჩასახვის ხანაა. ერთმანეთისგან ვიზუალურად თუ კონცეპტუალურად სრულიად განსხვავებულ მიმდინარეობათა თანაარსებობა, მათი პარალელური განვითარება ავანგარდულ სახვით ხელოვნებას განსაკუთრებულ დინამიზმს ანიჭებს.

გამოფენაზე დამთვალიერებელს საშუალება ეძლევა ერთ საგამოფენო სივრცეში იხილოს ქართული, რუსული, უკრაინული, პოლონური და იტალიური ავანგარდული ხელოვნების უნიკალური ფერწერული და გრაფიკული ნამუშევრები. მათი დიდი ნაწილი პირველად გამოიფინება ფართო საზოგადოების წინაშე.

ექსპოზიციაზე წარმოდგენილია შალვა ამირანაშვილის სახელობის ხელოვნების მუზეუმის კოლექციებში დაცული ვასილ კანდინსკის, ნიკო ფიროსმანაშვილის, მიხეილ ლარიონოვის, ნატალია გონჩაროვას, ოლგა როზანოვას, კირილე ზდანევიჩის, დავით კაკაბაძის, ლადო გუდიაშვილის, ზიგა ვალიშევსკის, კაზიმირ მალევიჩის, ალექსეი კრუჩიონიხის, რობერტ ფალკის, ოსვალდო ლიჩინის, ალექსანდრე შევჩენკოს, შალვა ქიქოძის, მიხეილ ბილანიშვილის, ვოლდემარ ბობერმანის, ლევ ბრუნის და კლიმენტ რედკოს 100-მდე ფერწერული და გრაფიკული ნამუშევარი, საარქივო მასალა, ავანგარდული აფიშები და წიგნები.

გამოფენა ეძღვნება ავანგარდის იდეისა და კონცეფციის, თეორიისა და ალოგიზმის ერთ-ერთი სულისჩამდგმელის, პოლონური წარმოშობის ქართველი პოეტისა და ლიტერატორის ილია ზდანევიჩის (ილიაზდი 1894-1975) ხსოვნას. ილიაზდის პერსონა არ მიეკუთვნება ერთი რომელიმე ერისა თუ ქვეყნის კულტურას. მისი შემოქმედება თანაბრად ფასეულია როგორც ქართული, რუსული, ფრანგული და პოლონური კულტურების, ასევე, ზოგადად, მსოფლიო კულტურული მემკვიდრეობისთვის.
გამოფენის ფარგლებში გამოიცა ორენოვანი კატალოგი, რომელშიც მუზეუმის ავანგარდული ხელოვნების კოლექციის ისტორიასთან ერთად სრულად არის დაბეჭდილი ილია ზდანევიჩისა და ნიკო ფიროსმანის ურთიერთობის ამსახველი დღიურები.

საქართველოს კულტურისა და ძეგლთა დაცვის სამინისტროს მხარდაჭერით, პროექტის ფარგლებში, 16-18 ივნისს ეროვნულ მუზეუმში გაიმართება საერთაშორისო კონფერენცია სახელწოდებით „ავანგარდის იდეა ხელოვნებასა და ლიტერატურაში".
გამოფენა 2016 წლის 18 ივლისამდე გაგრძელდება.

მისამართი: შალვა ამირანაშვილის სახელობის ხელოვნების მუზეუმი, ლადო გუდიაშვილის ქუჩა

მუზეუმის კვირეული: "ქეთევან მაღალაშვილი 120"

17.05.2016 – 22.06.2016
ეროვნული გალერეა
2016 წლის 17 მაისს 19:00 საათზე მუზეუმის საერთაშორისო დღისადმი მიძღვნილი საქართველოს ეროვნული მუზეუმის კვირეულის ფარგლებში, დიმიტრი შევარდნაძის სახელობის ეროვნულ გალერეაში, გიწვევთ ქართული მხატვრობის გამორჩეული წარმომადგენლის ქეთევან მაღალაშვილის 120 წლის იუბილესადმი მიძღვნილ გამოფენასა და წიგნის პრეზენტაციაზე ,,ქეთევან მაღალაშვილი 120".
ქეთევან მაღალაშვილის საიუბილეო გამოფენის ფარგლებში შედგება ორენოვანი (ქართულ-ინგლისური) მონოგრაფიის ,,ქეთევან მაღალაშვილი 120" პრეზენტაცია, რომელიც საქართველოს კულტურისა და ძეგლთა დაცვის სამინისტროს მხარდაჭერით გამოიცა. მონოგრაფიის ავტორია ხელოვნებათმცოდნე ნანა მირცხულავა.
მისამართი: დიმიტრი შევარდნაძის სახელობისეროვნული გალერეა, შოთა რუსთაველის გამზ. 11.
***


 

„სახვითი ხელოვნების განვითარების ხელშეწყობა“

განცხადება

29.02.2016
საქართველოს კულტურისა და ძეგლთა დაცვის სამინისტრო აცხადებს კონკურსს 2016 წლის „ხელოვნების განვითარების ხელშეწყობის ქვეპროგრამის“ ფარგლებში თბილისსა და რეგიონებში გამოფენების და მასთან დაკავშირებული ღონისძიებების ხელშეწყობაზე

1. კონკურსის მიზანი
საქართველოს ვიზუალური ხელოვნების ფართო სპექტრის (ფერწერა, გრაფიკა, ქანდაკება, დეკორატიულ-გამოყენებითი, ფოტოხელოვნება, მულტიმედია და თანამედროვე ხელოვნების სხვა მიმართულებები) წარმოჩენა თბილისსა და რეგიონებში თემატური, ჯგუფური, თუ პერსონალური გამოფენების მოწყობით, ქვეყანაში კულტურული ცხოვრების გააქტიურება.

2. კონკურსის პირობები
საქართველოს კულტურისა და ძეგლთა დაცვის სამინისტროს „ხელოვნების განვითარების ხელშეწყობის ქვეპროგრამის“ ღონისძიებიდან „სახვითი ხელოვნების განვითარების ხელშეწყობა“ ხელი შეეწყობა პროექტებს თბილისსა და რეგიონებში გამოფენების და მასთან დაკავშირებული ღონისძიებების მოსაწყობად;
კონკურსში მონაწილეობის მიღება შეუძლია სახვითი ხელოვნების სფეროში მოღვაწე იურიდიულ პირებს;
კონკურსში დაიშვება კონკურსანტის მიერ საკონკურსოდ წარმოდგენილი მხოლოდ 1 პროექტი;
სამინისტროდან მოთხოვნილი თანხა არ უნდა აღემატებოდეს 10 000 (ათი ათასი) ლარს;
პრიორიტეტი მიენიჭება თანადაფინანსების მქონე პროექტებს, ახალგაზრდა ხელოვანთა შემოქმედების წარმომჩენ პროექტებს;
კონკურსში გამარჯვებულ პროექტებს გამოავლენს და რეკომენდაციებს შეიმუშავებს საკონკურსო კომისია.

3. საკონკურსო პროექტების წარმოდგენის პირობები
პროექტი წარმოდგენილი უნდა იყოს სამინისტროს მიერ შემუშავებული განაცხადის ფორმის შესაბამისად (იხილეთ თანდართულ ფაილში) და მას უნდა ერთვოდეს წერილი მინისტრის სახელზე საკითხის მოკლე აღწერით. წერილში აღნიშნული უნდა იყოს კონკურსის სახელწოდება (კონკურსი - „თბილისსა და რეგიონებში გამოფენების და მასთან დაკავშირებული ღონისძიებების ხელშეწყობა“). პროექტი და ყველა თანდართული მასალა წარმოდგენილი უნდა იყოს CD ვერსიის სახითაც (CD ვერსიაზე იურიდიული პირის სახელწოდება).
თანადაფინანსების მქონე პროექტს უნდა ერთვოდეს - თანადამფინანსებლის საგარანტიო წერილი;
პროექტს უნდა ერთვოდეს - საგარანტიო წერილი იმ ორგანიზაციიდან, სადაც დაგეგმილია გამოფენა;

4. კონკურსის განრიგი
საკონკურსო პროექტების მიღება იწყება 2016 წლის 1 მარტიდან;
პროექტების წარმოდგენის ბოლო ვადაა 2016 წლის 25 მარტის 18:00 სთ;
საკონკურსოდ წარმოდგენილი პროექტების განხილვა შედგება 2016 წლის 31 მარტს;
კონკურსის შედეგები გასაჯაროვდება 2016 წლის 5 აპრილს;
პროექტი უნდა განხორციელდეს 2016 წლის ბოლომდე;
კონკურსზე შემოტანილი მასალა უკან არ ბრუნდება;
პროექტი და ყველა თანდართული მასალა წარმოდგენილი უნდა იყოს მისამართზე: ქ. თბილისი, სანაპიროს ქ. N4, საქართველოს კულტურისა და ძეგლთა დაცვის სამინისტრო;

კონსულტაციები გაიმართება ყოველ ოთხშაბათს 14:00 საათიდან 18:00 საათამდე საქართველოს კულტურისა და ძეგლთა დაცვის სამინისტროს ხელოვნებისა და განათლების დეპარტამენტში (ტელ: 299 9037).

http://culture.gov.ge/News/ganckhadeba-(119).aspx

მერაბ აბრამიშვილი

09.03.2016-03.04.2016

ზურაბ წერეთლის თანამედროვე ხელოვნების მუზეუმი
MOMA TBILISI

2016 წლის 9 მარტს 19.00 საათზე, გიწვევთ გამოფენის გახსნაზე და მხატვრის ახალი კატალოგის და მერაბ აბრამიშვილის ფონდის”ბიზონი” პრეზენტაციაზე.
მერაბ აბრამიშვილი (1957 – 2006) თანამედროვე ქართული ხელოვნების გამორჩეული წარმომადგენელია. მისი სტილი, რომელიც ქართული კულტურული მემკვიდრეობის, კერძოდ კი ქართული ფრესკების თანამედროვე ტრანსფორმაციის უჩვეულო მაგალითს წარმოადგენს, განსაკუთრებულ მოვლენად აღიქმება არა მხოლოდ ქართული ხელოვნების ფონზე, არამედ თანამედროვე მსოფლიოს ხელოვნების სივრცეშიც, რასაც ადასტურებს ის ფაქტიც, რომ ამ მხატვარმა უკვე მნიშვნელოვანი ადგილი დაიმკვიდრა საერთაშორისო ხელოვნების ბაზარზე. 2013 – 2014 წწ. მისი ნამუშევრები წარმატებით მონაწილეობდა ლონდონის სოთბის სააუქციონო სახლის მიერ გამართულ გამოფენებზე “გზაჯვარედინზე 1. შუა აზიისა და კავკასიის თანამედროვე ხელოვნება” და “გზაჯვარედინზე 2. სტამბულიდან ქაბულამდე”, ასევე სოთბის 2014 – 2015 წელს გამართულ სხვადასხვა აუქციონებზე. მხატვრის ნამუშევრების დიდი ნაწილი საქართველოს და უცხოეთის კერძო კოლექციებშია დაცული.
გამოფენაზე წარმოდგენილი იქნება მხატვრის შემოქმედება 1985 წლიდან – 2006 წლამდე, საქართველოსა და უცხოეთის კერძო კოლექციებიდან. სავარაუდოდ 200 – ზე მეტი ნამუშევარი; ასევე ფოტო და საარქივო დოკუმენტები. მომზადდა და გამოიცა მხატვრის ნამუშევრების ახალი, მესამე კატალოგი. თბილისის შემდეგ, სავარაუდოდ, იგეგმება გამოფენის ექსპონირება სხვადასხვა ქვეყნებში, რაც უდავოდ დიდ როლს შეასრულებს თანამედროვე ქართული კულტურის პოპულარიზაციის საქმეში, ჩვენი ქვეყნის საზღვრებს გარეთ.
გამოფენის კურატორი: ბაია წიქორიძე


გამოფენაზე, კატალოგის გარდა, წარმოდგენილი იქნება და გაიყიდება მერაბ აბრამიშვილის ნამუშევრების მიხედვით შესრულებული სხვადასხვა პროდუქცია: რეპროდუქცია აბრეშუმზე, ბარათი, სანიშნე, ბლოკნოტი, სარკე, ჭურჭელი, ჩანთა და სხვა.
კატალოგის და ამ პროდუქციის შეძენა შესაძლებელია მუზეუმის მაღაზიაში.

მუზეუმი მუშაობს ყოველდღე, ორშაბათის გარდა 11.00 – 18.00 სთ.


ფარხად ხალილოვი

01.03.2016-22.03.2016
2016 წლის 1 მარტს 19:00 საათზე საქართველოს ეროვნული მუზეუმის დიმიტრი შევარდნაძის სახელობის ეროვნულ გალერეაში გიწვევთ აზერბაიჯანელი მხატვრის ფარჰად ხალილოვის გამოფენის გახსნაზე.
ფარჰად ხალილოვი თანამედროვე ხელოვნების ბრწყინვალე წარმომადგენელია. მან შეძლო საბჭოთა იდეოლოგიისაგან თავისუფალი, საკუთარი სტილის შექმნა და კავკასიელის მდიდარი ბუნებისა და შინაგანი სამყაროს საინტერესო კუთხით წარმოჩენა. ექსპოზიციაზე წარმოდგენილი იქნება მის მიერ სხვადასხვა ჟანრში შესრულებული ფერწერული ტილოები.
ფარჰად ხალილოვს დღემდე არაერთი პერსონალური გამოფენა ჰქონდა ლონდონში (საათჩის გალერეა), ბერლინში (საქალაქო ადმინისტრაციის გალერეა), მოსკოვში (მხატვართა ცენტრალური სახლი და ტრეტიაკოვის სახელმწიფო გალერეა), ბაქოში (სახელმწიფო მუზეუმების ცენტრი), პარიზში (La Cite Internationale des Arts). ასევე, მონაწილეობა აქვს მიღებული სხვადასხვა ქვეყნის 40-მდე ჯგუფურ გამოფენაში.
მისი ნამუშევრები ინახება აზერბაიჯანის, უკრაინის, რუსეთის, ლიტვის, გერმანიის, ჩინეთის სახელმწიფო მუზეუმებისა და აზერბაიჯანის მხატვართა საერთაშორისო კონფედერაციის კოლექციებში. ასევე, აშშ-ს, გერმანიის, პოლონეთის, საფრანგეთის და მექსიკის კერძო კოლექციებში.
ფარჰად ხალილოვი 1987 წლიდან დღემდე აზერბაიჯანის მხატვართა კავშირის თავმჯდომარეა. მას სხვადასხვა დროს მიღებული აქვს მრავალი ჯილდო. დღეს, მისი ნამუშევრები იყიდება სოტბისა და ფილიპ დე პიურის აუქციონებზე.
მისამართი: დიმიტრი შევარდნაძის სახელობის ეროვნული გალერეა, რუსთაველის გამზირი 11.



Search